Glæsilegt

Að öðrum ólöstuðum þótti mér Alexander eiga stórleik í dag. Einnig var innkoma Ingimundar í vörnina glæsileg, sem varð til þess að markvarslan var ekki dragbítur auk þess að stuðla að fjöldamörgum feilum í sóknarleik Þjóðverjanna. Reyndar má segja að liðsheildin hafi staðið upp úr - og greinilegt að Guðmundur hefur lært af mistökum fyrri ára og gefur nú fleirum tækifæri á að spreyta sig, sérstaklega í sókninni. Slíkt veit á gott í þeim erfiðu verkefnum sem bíða strákanna í Peking - þeir virðast vel stemmdir og fullir sjálfstrausts og vita sem er að tveir góðir sigrar duga e.t.v. inn í 8 liða úrslit, þar sem alvaran tekur við.

Strákarnir eru vel að sigrinum komnir í dag og þrátt fyrir að lukkan hafi eilítið gengið í lið með þeim við meiðsli eins lykilmanna Þjóðverja virtust þeir ávallt hafa trú á því að tækist að leggja heimsmeistarana. Ljóst er að góður hugur er í hópnum og Guðmundur virðist hafa náð betri tökum á að hrista saman drengina í samstillta heild. Lykilmenn á borð við Ólaf og Snorra eru ekki ofkeyrðir og breiddin er fyrir vikið meiri þegar hægt er að stilla saman strengina með þessum hætti. Hver veit nema strákarnir nái langt en hvað sem verður er maður glaður yfir árangrinum fram til þessa.

Alexander: Getum ekki fagnað lengi