Sænsk vopnaframleiðsla að gera það gott

Á síðasta ári náði vopnaútflutningur Svía nýjum hæðum þegar seld voru vopn fyrir nær 100 milljarða íslenskra króna út um allan heim. Helstu kaupendur voru S-Afríka og Pakistan það árið en USA var einnig stórtækur kaupandi. Herþotur, handsprengjur og radartæki voru helstu útflutningsvörurnar með Saab og Bofors sem helstu framleiðsluaðila. Salan jókst um 20% frá fyrra ári og hefur vaxið jafnt og þétt um árabil að sögn Nyhedsavisen í dag.

Velgengni þessa iðnaðar er í hróplegu ósamræmi við þá friðarímynd sem Svíar hafa reynt að deila með umheiminum, sérstaklega á árum áður. Með hr. Palme við stjórnvölinn voru Svíar óþreytandi í gagnrýni sinni á stríðsrekstur annarra, sérstaklega USA, en á sama tíma seldu þeir Bofors fallbyssur og önnur stríðstól til Afríku, Asíu og víðar. Þeir reyndar pössuðu sig á því að selja einungis til aðila sem ekki áttu í stríði en það hjálpadi sumum við að byggja upp vopnabúr til síðari notkunar. Það er nefnalega svo að hefðbundin vopn búa ekki yfir miklum fælingarmætti, ólíkt t.d. kjarnavopnum.

Hvað sem segja má um stríðstólabrölt Svía er næsta víst að vopnin verða óhemju örugg í notkun, hálfgerðir Volvóar stríðstólanna. Að vísu áttu herþotur þeirra í flugi til að missa vængina á níunda áratugnum (Viggen herþotur) en nú segir sagan að allt sé í stakasta lagi og stjórnendur stríðsvopnanna þurfi ekki að óttast neitt, væntanlega med 5 punkta öryggisbelti og allt! Hins vegar þurfa þeir sem mögulega verða fyrir eyðingarmætti vopnanna að hugsa sinn gang því sænska vopnastálið lætur ekki að sér hæða nú, fremur en t.d. í seinna stríði.

Hvað á maður annars að segja? Vopnaframleiðsla mun halda áfram óháð Svíum og e.t.v. eins gott að taka þátt og hagnast á öllu saman. Sú helgi sem fylgdi friðarboðskap þeirra og sjálfsréttlætingu í utanríkismálum á seinustu öld er verulega myrkvuð. Vopnasalan gaf jú alltaf sitt í skjóli þess að Palme og aðrir boðuðu sænskan frið. Niðurstaðan er sú að glansmyndin er horfin fyrir fullt og allt. Kristur kunni e.t.v. einn á þessu lagið enda var hann ekki með vopnaframleiðslu heima í Nazaret á milli þess sem hann boðaði kærleik og frið á jörðu.