Þjóðverjar stangaðir í gegn - Danir að flá rússneska björninn

Spánverjar voru rétt í þessu að rassskella Þjóðverja. Rosalega sterk vörn, með hinn ægilega Hombrados á milli stanganna, sá til þess að Þjóðverjar skoruðu einungis 22 mörk í leiknum. Á sama tíma small sóknin saman hjá Spánverjum í síðari hálfleik með kröftugum leik, gegnumbrotum, línuspili og glæsimörkum úr hornum og úr hraðaupphlaupum. Þjóðverjar voru ótrúlega staðir í öllum sínum aðgerðum og höfðu engin svör við nautabönunum úr suðri. Þrjú lið virðast á leið upp úr riðlinum, öll með 2 stig: Þjóðverjar, nautabanarnir frá Spáni og Ungverjar.

Í leik Dana og Rússa ríkir algert andleysi hjá rússneska birninum. Fréttir af andláti hins gamla, klassíska stíls frá dögum Sovétsins hefur einhverra hluta vegna ekki borist til Moskvu og nú er rússneska birninum að blæða út. Danir skemmta sér nokkuð vel en vita sem er að andstæðingurinn er sigraður og er að líkum á leið heim að sleikja sár sín.

Svíar unnu stórsigur á Slóvökum