Kistulagning framboðs Giuliani hefst í Florida

Skv. skoðanakönnunum eru McCain og Romney nær jafnir í fyrsta sæti með tæp 30% en Guiliani í því þriðja með um 15%, á undan Huckabee með um 14%. Rúm 10% voru enn óákveðnir. Forkosningarnar í Flórida ná einungis til flokksbundinna Repúblikana, líkt og hjá Demókrötum. Ljóst er að Giuliani bíður vandasöm ákvörðun á morgun. Hann hefur lagt mikið í forvalið í Flórida og hann mun tapa stórt. Ef McCain vinnur er hann áfram á beinu brautinni en Romney verður að vinna til þess að halda í möguleika sína. Vissulega gæti Giuliani enn haldið baráttunni áfram, allt til 5. febrúar, en jafnvel í New York mælist hann ekki jafn sterkur sem fyrr og áhrifaríkir fjölmiðlar og stuðningsaðilar hafa snúið sér annað.

Flokkur Repúblikana hefur ákveðið að einungis skuli barist um 57 sæti í stað helmingi fleiri vegna deilna um dagsetningu forkosninganna. Af sömu ástæðu var ákveðið að Flórida skyldi ekki fá einn einasta fulltrúa inn á landsþing Demókrata. Í því ljósi samþykktu frambjóðendur Demókrata að leggja ekki eyri í kosningabaráttu sína í sólskinsríkinu. Hins vegar hafði Clinton það á orði eftir tap sitt í S-Karolínu að Flórida væri næsti orrustuvöllur forkosninganna. Henni er spáð um helmingi atkvæða á meðal flokksbundinna á meðan Obama er áætlað rúmlega fjörðungi, lnokkru meira en Edwards.

Í Flórida búa nær 16 milljónir manna og hefur þeim fjölgað árlega sem nemur fólksfjölda Íslands í nær 40 ár, um 300.000 íbúa. Meðaltekjur á mann voru áætlaðar um 30.000 $ árið 2005, helsta tekjulindin er ferðaiðnaður og atvinnuleysi er um 3,3%. Aldursdreifingin er jafnari en margan grunar, t.d. eru 17,6% 65 ára og eldri. Frá því árið 1960 hafa Demókratar einungis fengið fleiri atkvæði en Repúblikanar þrisvar í forsetakosningum (í 12 kosningum) og ríkisstjórinn, Charlie Crist, er Repúblikani. Höfuðborgin heitir Tallahassee, stærsta borgin Jacksonville og ríkið er um 170 þ. ferkílómetrar að flatarmáli.

Framboð Giulianis á bláþræði