Clinton að tapa í Kaliforníu - Huckabee sigrar í V-Virginíu

Ef rétt reynist að straumurinn yfir til Obama síðustu dægrin sé að færa honum sigur í Kaliforníu er ekki von á góðu fyrir Clinton. Henni mun vegna vel í sínu heimaríki og nágrenni en nær alls staðar hefur Obama sótt á. Clinton og Obama hafa svipaðar áherslur í stefnuskrám sínum, munurinn liggur í persónum þeirra fyrst og fremst. Annars vegar er hin margreynda frú Clinton, sem leggur áherslu á reynslu sína og þekkingu á málefnum stjórnmálanna í Washington, til þess að hrinda í framkvæmd breyttum áherslum. Hins vegar er hinn ferski Obama, sem boðar breytingar og nýja sýn í krafti nýs fólks. Obama hefur vakið von í brjósti margra Bandaríkjamanna um að framundan séu breyttir og betri tímar - að hann geti sameinað þjóðina á margan þann hátt sem Clinton tækist ekki.

Rétt í þessu var Huckabee að tryggja sér sigur á lokuðu þingi 1.100 Repúblikana í V-Virginíu, þar sem kosið var þar til einn frambjóðenda fékk meirihluta. Hann rétt marði Romney og fær því alla fulltrúa ríkisins, eða 18 talsins. Huckabee gæti mögulega unnið eitt eða tvö önnur ríki á meðan McCain mun líklegast sigra í alla vega 15. Romney gæti unnið í fáeinum en eins og staðan er núna, og að því gefnu að McCain sigri í Kaliforníu, má segja að McCain standi með pálmann í höndunum.

Obama með forskot í Kaliforníu