Enn eitt andlit Clintons - Romney e.t.v. varaforsetaefni?

Það er eins og hernaðaráætlun Clintons breytist dag frá degi - eða er það áætlunin? Eftir að ljóst var hvert stefndi í Mississippi, þar sem Obama vann yfirburðasigur, var ákveðið að skipta yfir í harðari taktík, að virkja grasrótina sem mest og almennt að beita sér á öllum vígstöðvum, sérílagi með harðri gagnrýni á Obama eins og virtist takast vel í Texas og Ohio. Nú bregður svo við að senatorinn frá New York er nauðbeygður til þess að afsaka sig - að vísu með semingi hvað Ferraro varðar. Einhverra hluta vegna er eins og Clinton geti ekki ákveðið í hvorn fótinn hún á að stíga.

Hillary Clinton hefur verið ötul við að benda á reynsluleysi mótframbjóðanda síns, senatorsins frá Illinois. Ítrekaðar auglýsingar, sendibréf og annað efni hefur hamrað á því hve Obama sé óhæfur til þess að takast á við mörg krefjandi verkefni framundan, að ekki sé nú talað um hve illa undirbúinn hann er til þess að taka erfiðar ákvarðanir undir álagi, s.s. ef öryggi landsins er ógnað. Í ljósi alls þessa má það teljast stórfurðulegt að Clinton hafi ljáð máls á að vilja í framboð með honum ... þó svo að hún í lítillæti sínu hafi ætlað honum annað sætið.

McCain hefur að nokkru setið á hliðarlínunni í fjölmiðlafárinu í kringum forval Demókrata þessa dagana. Ég fjallaði um það m.a. að McCain gæfist nú tími til þess að safna kröftum og sameina Repúblikana fyrir átökin næsta haust. Hin hliðin er vitanlega sú að öll athyglin beinist nú að Demókrataflokknum. Mitt Romney, sem hafði gefið það út að hann yrði ekki varaforsetaefni McCains, hefur nú ljáð máls á slíku. Báðir segjast þeir hafa grafið stríðsöxina sín á milli og aðspurður gaf McCain ekki mikið uppi um þessar vangaveltur að svo stöddu. Sterk staða Romneys í Massachusetts og á sviði efnahagsmála gæti hjálpað McCain og sögur herma að aðilar í Bush stjórninni vinni nú að mögulegu framboði McCains og Romneys.

Hillary Clinton biðst afsökunar