Ólíkindakeppni - 50/50 á móti Pólverjum

Fyrirfram hefði ég óskað okkur þess að mæta Pólverjum í 8 liða úrslitum. Í upphafi móts hikstaði pólska kjötfarsið en hefur tekið sig á og var nú nálægt því að leggja Frakkana, sem til þessa hafa sýnt bestan leik allra liða á mótinu. Reyndar hefur það einnig verið svo undanfarin tvö stórmót, Frakkar hafa virst vera með sterkasta liðið en klikkað í mikilvægum leikjum og orðið af verðlaunum. Hver veit nema frönsku kjúklingarnir reynist ferskari á kínverskri grund og hali inn verðlaunum, jafnvel gulli.

Danir koma sterkir inn eftir brokkgenga byrjun og eru til alls líklegir. Ekki á hverjum degi sem heimsmeistarar eru teknir í bakaríið af nágrönnum sínum Dönum og smáþjóðinni í N-Atlantshafi, Íslendingum, í sömu keppni. Það hlýtur að vera svekkjandi að komast ekki áfram úr undanriðli með 5 stig og sigri gegn efsta liðinu, S-Kóreumönnum, sem tapa fyrir Rússum og hleypa rússneska birninum inn úr kuldanum á kostnað þýska stálsins.

Íslendingar gátu ekki lent neðar en í þriðja sæti og breytti þetta eina stig gegn Egyptum engu þar um. Hið eina sem hefði breytt nokkru var að sigra egypsku hlaupagikkina, sem sjálfkrafa hefði gefið færi á annað hvort Króötum eða Spánverjum, sem ekki hafa sýnt sínar sterkustu hliðar til þessa í mótinu. Svo virðist sem A-riðillinn sé ekki jafn sterkur og af var látið en svo er að sjá hvernig gengur í útsláttarkeppni þeirra 8 liða sem eftir eru. Þar gætu lið úr okkar riðli strítt hinum í alla vega 3 leikjanna.

Möguleikar Íslands gegn Pólverjum eru í mínum huga í besta falli 50/50. Ef við náum upp baráttu og samhug getum við unnið Pólverjana. Með því kæmumst við alla vega jafn langt í keppninni og árið 1992, þegar við töpuðum fyrir Frökkum í leik um þriðja sætið og lengra en í Seoul, þegar að mig minnir við töpuðum naumlega fyrir Ungverjum um réttinn til þess að spila um verðlaun. Í keppninni um 5-8. sætið komumst við alla leið og lögðum Spánverja örugglega í leik um 5. sætið (ef ég man rétt). Eitt er víst, strákarnir ætla sér lengra og að því hafa þeir stefnst leynt og ljóst frá því í sumar.

Íslendingar mæta Pólverjum í 8-liða úrslitum

Athugasemdir

[Marinó G. Njálsson, 18.8.2008 kl. 15:59]

Sammála þér í þessu, Óli.  Ég held að möguleikar okkar gegn Pólverjum séu 50/50, en munurinn á Póvlerjum og þeim liðum sem við höfum verið að mæta er líklegast hæðin.  Að öðru leiti er þetta lið sem er í endalausum klippingum fyrir utan og því verður mikilvægt að menn sofni ekki á verðinum í vörninni.

[Karma (IP-tala skráð) 18.8.2008 kl. 16:27]

Jákvæði punkturinn í þessu er að við mætum Spánverjum eða S-Kóreumönnum í næsta leik (hvort sem það eru undanúrslit eða í baráttunni um 5 sætið). Spánverjarnir hafa verið ósannfærandi á mótinu og ég hef fulla trú að við getum unnið Kóreumenn enda spiluðum við bestu vörnina einmitt á móti þeim.

Það verður bara að stoppa rauðhærða guttann hjá Pólverjunum sem virðist geta skorað þegar honum sýnist.

[Ólafur Als, 18.8.2008 kl. 16:33]

Reyndar þykir mér sem handboltinn hafi staðnað lítillega - og að hraðinn hafi minnkað. Nýliðun virðist ekki mikil allra síðustu árin en þriðja stóra mótið er nú í gangi á innan við 20 mánuðum með nær sömu liðum og sama mannskap. Dagsformið virðist hafa mikið að segja, ekki einungis hjá okkar mönnum. Í síðustu keppni náðu Danir að dreifa álaginu á sína menn og því gátu þeir betur tekist á við það álag sem er á mönnum í svona keppni. Frakkar söknuðu t.d. skyttu á hægri vængnum, sem gerði þeim erfitt fyrir þegar á keppnina leið. Ég veit ekki hvernig staðan er hjá þeim á þessu móti hvað þetta varðar.

Nú er Guðmundur betur á nótunum og hvílir lykilmenn. Þreyta ætti því ekki að hrjá íslensku leikmennina næsta fimmtudag. Hins vegar er afar mikilvægt að Snorri Steinn nái sér á strik í sókninni og að Guðmundur raði rétt inn á miðjuna. Ingimundur byrjaði afar vel en virðist ekki henta jafn vel á móti sóknarbolta sem byggir mikið á klippingum. Og svo mætti Ásgeir Örn koma sterkar inn, sem ver er til í stráknum - hann var að vísu ekki að standa sig síðastliðinn vetur með GOG og reyndar átti Snorri Steinn afar misjafna daga.