Smjörklípuaðferðin lætur ekki að sér hæða!

Steingrímur vill vitanlega ekki ræða kúvendingu sína í afstöðu sinni til efnahagsúrræða AGS - hann lætur sér í léttu rúmi liggja að hafa talað digurbarkalega um þau mál fyrir ekki margt löngu. Nú hefur hann uppgötvað að starfsmenn AGS er fólk sem hægt er að ræða við. Hvað hann hélt um þau mál áður hefur ekki komið fram. Það er við hæfi að benda hinum nýja fjármálaráðherra á þau umskipti sem hafa orðið í afstöðu VG til AGS og þess lánapakka, sem honum er tengdur, og inna formanninn fregna af því.

Hvort fyrrverandi fjármálaráðherra sé bestur til þess fallin að krefja nýja ráðherra um reikningsskil fyrri skoðana skal ósagt látið. Alla vega má hann búast við skætingi á borð við þann sem hæstvirtur ráðherra kastaði til hans úr ræðustóli alþingis. Smjörklípuaðferðin verður óspart notuð á þingmenn Sjálfstæðismanna á næstunni, með yfirskriftinni: "Já, en hvað með ykkur ... ?". Harðir stuðningsmenn stjórnarflokkanna munu kætast yfir þeirra mönnum og segja það gott á Sjálfstæðismenn - en jafnframt munu þeir hafa gleymt eigin gagnrýni á slíkar orðræður.

Sjálfstæðismenn þurfa að læra að vera í stjórnarandstöðu. Vitanlega geta þeir látið öllum illum látum og vonast til þess að hitta naglann á höfuðið í einstaka málum. Slík happa og glapp aðferð yrði þeim þó ekki til sóma, því þrátt fyrir allt liggja svo stór verkefni fyrir alþingi á næstu vikum og mánuðum að ekki mun veita af að sýna samstöðu með stjórnvöldum í öllum þeim málum sem mögulegt er að styðja þau í - og jafnvel hafa áhrif á til góðs, ef nokkuð er að marka forsætisráðherra, þegar hann lofaði samvinnu á alþingi.

Þingmenn í meðferð

Athugasemdir

[Baldur (IP-tala skráð) 5.2.2009 kl. 17:15]

Skrípalæti á Alþingi, ljótt að sjá.  Steingrímur er gagnlaus eins og flokksystkyni hans öll.  Þessir ónytjungar sem nú loksins hafa komist í stjórn sanna vanhæfni sína dag eftir dag, nokkrir dagar liðnir og þetta fólk lærir seint mannasiði.  Steingrímur sér það nú að auðvelt er að vera á móti öllu, en að gera hlutina er allt annað mál.  Kommarnir eru svo steiktir, afsakið orðbragð en þetta er satt.  Hættulegur tími nú þartil við kjósum en vonum bara að þjóðin sjái hversu miklir ónytjungar þetta eru.  Sjálfstæðisflokkurinn var við það að missa mitt atkvæði, en þrátt fyrir mörg mistök er hann ljósárum á undan VG og Samfylkingu, spurning um að Framsókn stækki og geti myndað stjórn með Sjálfstæðismönnum. Bíð spenntur eftir að Samfylking klofni, sendi kommana og ríkis-þurfalingana yfir í VG og geri alvöru jafnaðarmannaflokk.

[Ólafur Als, 5.2.2009 kl. 17:24]

Sem Sjálfstæðismanni er mér þó skapi næst að flokkurinn fái að kenna á því í næstu kosningum. Mér þykir sem sumum í forystusveitinni veiti ekki af að viðurkenna mistök og í framhaldinu reyna að læra af þeim - sumir mættu reyndar taka poka sinn og sjá til þess að hleypa nýju fólki að. Sem stendur líður mér ekki allt of vel með það að hygla "mínu" fólki, einungis vegna þess hve "hinir" eru slæmir. Nú vil ég að Sjálfstæðisfólk fylki sér á bak við hugmyndir - en ekki endilega leiðtoga, þó svo að góðir leiðtogar séu nauðsynlegir hverju stjórnmálaafli sem er. Nú þarf að setja fókusinn á atvinnufrelsi einstaklinga (litla manninn), stétt með stétt, þak yfir höfuðið og allar góðu hugmyndirnar sem sameinað hafa svo marga borgaralega og frjálslynda Íslendinga.