Er almenningur illa upplýstur?

Hvernig líður umfjöllun fjölmiðla um þær hræringar sem nú eru á fjármálamörkuðum og hver áhrifin kunni að verða á efnahag? Um árabil hefur mér fundist vanta á almenna og skilmerkilega umfjöllun (og reglubundna) um íslenska fjármálamarkaðinn, útrásina og annað er varðar efnahag, sem almenningur geti áttað sig á og talið sér þarft að fylgjast með.

Sjónvarpið er afar heppilegur miðill hvað þetta varðar því hann getur betur en aðrir miðlar sett fram upplýsingar í myndrænu formi. Ég fæ ekki séð að almenningur hafi mikinn áhuga á stuttum innslögum um verðmæti einstakra fyrirtækja eða hve vísitalan hafi farið upp eða niður. Upplýsingar af því tagi eru ætlaðar þeim sem eru afar vel inni í hlutunum eða í besta falli "Séð og heyrt" sem segir fréttir af ríka fólkinu og verðbréfaeign þeirra.

Íslendingar eru sér meðvitaðir um kostnaðinn af lánunum sínum en hafa um of látið sig hafa það. Með betri innsýn í fjármálaheiminn, sem þarf alls ekki að vera svo flókinn, gætu Íslendingar betur áttað sig á þeim kröftum sem hafa áhrif á vextina, svo dæmi sé tekið - og þar með orðið betri neytendur: orðið sér meðvitaðri um lánakjör, um áhrif afskipta ríkisins og sveitarfélaga, ákvarðanir fjármálastofnana o.s.frv.

Spáir því að vextir lækki hraðar en áður var talið

Athugasemdir

[gfs (IP-tala skráð) 10.1.2008 kl. 20:55]

Heyr heyr.....

Þetta er nú bara besti pistill sem ég hef lesið lengi....

Ákvarðanatakan er hjá okkur en við nennum oft ekki, eða höfum ekki áhuga á því að gera lífið svolítið þægilegra og áhyggjulausara.......... er það ekki MERKILEGT....... ég meina hver vill það ekki...? 

[Ólafur Als, 10.1.2008 kl. 22:15]

Ég hef nú haft á orði svipað áður en á meðan áhuginn er ekki meiri, hvort heldur af hálfu almennings eða fjölmiðla, er ekki von á góðu. Að svo stöddu geri ég ekki ráð fyrir að hræringarnar, sem nú er minnst sérstaklega á, muni valda straumhvörfum í efnahag almennings.

Ekki er hægt að gera ráð fyrir öðru en að fjármálamarkaðir og hluthafar muni verða fyrir skaða en að hve miklu leyti almenningur mun finna fyrir því er allsendis óvíst að svo stöddu. Hér gæti skipt nokkru hver þróunin verður t.d. í kringum okkur og vestur um haf. Hlutur fjármálamarkaðarins í efnahag landsins verður æ stærri en eftir standa aðrar atvinnugreinar á fastari fótum, alltjent um þessar mundir.

Ef af niðursveiflu verður munum við sem aðrir sjá betri tíð síðar. Ég tel að almenningur eigi þann kost vænstan sem stendur að minnka skuldir (einhver gæti nú sagt að sá kostur væri ávallt skynsamur) og búa í haginn fyrir tímabundna erfiðleika og mæta síðan ferskir til næsta slags.