Leikirnir á Evrópumótinu í dag

Margir hörkuleikir framundan í dag (að staðartíma).

Pólland gegn Tékklandi í Stavanger kl. 15:15.

Pólverja mega ekki við öðru en að sigra, eftir tap gegn Króötum. Síðasti möguleiki fyrir Tékka að láta ljós sitt skína. Pólverjar hljóta að hafa það með sínum mögnuðu sóknarleikmönnum.

Svíar og Slóvakar í þrándheimi kl. 16:15.

Skv. sænskum dagblöðum eru sænsku leikmennirnir ekki smeykir fyrir leikinn við Slóvaka, þó blaðamenn vilji vara menn við og benda á hve stutt er á milli leikjanna. Reyndar er einn sænsku leikmannanna ekki viss um að hann fái nægan svefn eftir svekkjandi tapið gegn Frökkum. Ég er ekki á því að Svíar ættu að vinna leikinn - en mikið rosalega væri gaman að þeir töpuðu ...

Spánn gegn þýskalandi í Bergen kl. 16:30.

Í raun ættu þjóðverjar að klára leikinn en Spánverjarnir eru eftir sem áður sterkir. Í síðasta Evrópumóti töpuðu þeir úrslitaleiknum gegn Frökkum og áunnu sér titilinn óheppnasta lið Evrópumóta með tapi í 3 úrslitaleikjum. þjóðverjar hafa sýnt styrk í keppninni en eiga enn eftir að brillera. Gætu farið langt, jafnvel alla leið.

Danir og Rússar í Drammen kl. 17:15

Danir geta ekki búist við Rússum jafn slökum og á móti Norðmönnum. Spurning hvort rússneski björninn sé enn vankaður en einn lykilmanna liðsins, Ivanov, spilar væntanlega ekki og því búist við Fillipov á ný í leikstjórnendahlutverkið. Annars tjá danskir blaðamenn sig ekki mikið um leikinn en Boldsen er eitthvað ósáttur við gullvæntingar Dana og er honum nokkur vorkunn þar. Síðustu forvöð fyrir L.M. Madsen (sá sem skoraði sigurmarkið á móti okkur í fyrra!) að sýna hvað í honum býr, annars getur Wilbek skipt honum út fyrir t.d. Spellerberg í milliriðlunum.

Króatía gegn Slóveníu í Stavanger kl. 17:15

Króatar hafa sýnt styrk í keppninni fram til þessa en hér er um nágrannaslag að ræða þar sem sjálfum náttúrulögmálunum er ögrað. Króatar ættu að hafa sigur og eru eitt fjögurra liða gömlu A-Evrópu sem kemst áfram í milliriðlana.

Frakkar á móti Íslendingum í Trándheimi kl. 18:15 

Í sjálfu sér litlu að bæta við fyrri skrif hér. Ef menn spila ekki á fullu geta Frakkar leikið sér að okkur, hvílt menn og ullað framan í íslenska liðið. Hér verða menn að trúa á eigið ágæti og gefa sig allan í leikinn í alla vega 60 mínútur.

Ungverjar gegn Hvít-Rússum í Bergen kl. 18:30 

Ef Ungverjar vinna ekki leikinn er mér verulega brugðið. Hvít-Rússar hafa yfir jöfnu og hæfileikaríku liði að ráða en Ungverjar hafa einfaldlega betri einstaklinga innan sinna raða. Frábæran leikstjórnanda og hörku skyttur. Ekki spurning, Magyar vinnur!

Noregur og Montenegro í Drammen kl. 19:15

Minnst er um þennan leik að segja. Norðmenn vinna og fara í milliriðla með 4 stig. Vilja eflaust hvíla lykilmenn. Montenegro gæti komist áfram á skárri markatölu en Rússa og munu því vilja tapa með sem minnstum mun.

Liðin sem detta að líkindum út: Rússar, Hvít-Rússar, Tékkar og Slóvakar. Saga til næsta bæjar ef svona fer, Rússar að fara heim og þarf að leggjast undir híði fyrir átökin í Peking.

Norðmenn, Króatar, þjóðverjar og Frakkar líklegast áfram með 4 stig í milliriðlana.

Frakkar sterkari gegn Svíum

Athugasemdir

[Ólafur Als, 20.1.2008 kl. 14:09]

þjóðverjar eru núverandi heimsmeistarar og hafa verið stöðugir í leikjunum tveimur, ólíkt Spánverjum sem steinlágu fyrir Ungverjum ... that´s why! Hér er ekki verið að enduróma neinni óskhyggju, alla jafna myndi ég eflasut halda með Spánverjum.