Háspenna í lokin

Ótrúlegt drama á síðustu sekúndum leiksins þar sem sigurinn hefði getað endað hvoru megin sem var - í ekki mjög svo góðum leik, þar sem jafntefli hefði verið sanngjörnustu útslitin. Seinni hálfleikur gekk í bylgjum, Spanjólarnir komust í 20:16 en svo gerðu Svíar fimm mörk í röð og komust svo tveimur mörkum yfir þegar skammt var eftir. Á þessum kafla var spænska liðið að spila illa og vantaði allan neist í leikmenn. Líklegast enn slegnir yfir naumu tapi gegn Frökkum frá kvöldinu áður. En Svíar voru heldur ekki alltaf á tánum og Spánverjarnir náðu að jafna, 26:26.

En svo hófst dramað. Staðan jöfn, tæp mínúta eftir og Svíar með boltann. Gefa á línuna, brotið á línumanni, sem var ekki kominn í færi, og Spánverji í 2 mínútur. Tíminn stöðvaður, ekki víti. Svíar spila áfram einum fleiri og fá vítakast; 52 sek. eftir og tíminn enn stöðvaður. Hombrados ver sitt fjórða vítakast, hefur tekið öll vítaköst Svía. Spánverjar fara sér að engu óðslega, fiska fríkast og svo aftur, Sví rekinn af velli. Jafnt í liðum og spennan í hámarki. Tekst Spánverjum að rétta sinn hlut eftir ófarir gærdagsins, átta sekúndur eftir af leiktímanum, leiktíminn stöðvaður og hendi dómara komin upp. Spánverjar bæta sjötta útileikmanninum við og skilja markið sitt eftir autt. Þeir verða að ljúka sókninni sem fyrst áður er þeir fá á sig dæmda töf. Boltinn inn á miðju og aftur til hægri, skot sem klikkar og Svensson fær boltann í hendur strax, 5 sekúndur eftir. Sænsku þulirnir öskra hvað þeir geta að Svensson eigi að kasta boltanum fram í autt markið en Svensson gefur sér tíma og sér hornamanninn stóra, gefur á Kellmann lengst frammi, sem kastar í autt markið, sekúndu áður en leikurinn er flautaður af. Svíar sigra með einu marki og búnir að verða sér úti um 3 stig með mörkum skoruðum á síðustu andartökum síðustu tveggja leikja.

Ætla að fylgjast með leik Dana og Pólverja næst - á sama tíma fer fram annar hörkuleikur á milli Frakka og Þjóðverja, sem ég kíki væntanlega á með öðru auganu.

Svíar skelltu Spáni á síðustu sekúndu