Má það vera að Clinton tapi í Kaliforníu?

Ég var nú e.t.v. ekki að meina það bókstaflega, þegar ég sagði að Obama styrkti stöðu sína með degi hverjum. Svo virðist þó hafa verið raunin þessa örfáu daga fyrir prófkjör dagsins. Að því gefnu að tárvotir hvarmar Clintons hafi ekki breytt stöðunni, henni í hag, er Obama á góðri leið með að sigra keppinaut sinn í dag. Hverjum hefði dottið slíkt í hug fyrir örfáum vikum síðan. Breiðfylking þekktra Bandaríkjamanna hefur staðið í biðröð til þess að fá að styðja þingmanninn frá Illinois og ekki hefur það spillt fyrir baráttunni í Kaliforniu að Los Angeles Times ákvað að styðja Obama. Fyrir hálfum mánuði síðan hefði ekki heilvita maður veðjað á sigur Obama í Kaliforníu en nú gæti svo farið að jafnvel þar myndi hann sigra Clinton.

Ekki verður það ofsagt að ef Clinton tapar í Kaliforniu í annars jafnri keppni um land allt, verður það áfall fyrir hana. Hún mun sigra í New York og nágrenni á meðan Obama leiðir örugglega í suðrinu og sínu heimaríki, Illinois. Í sumum ríkjum er baráttan hnífjöfn þar sem óákveðnir munu ráða úrslitum. Fylgi á meðal stuðningsmanna Demókrata er á leið yfir til Obama þessa dagana. Um það verður ekki villst. Clinton hefur gríðarlega sterkt apparat á bak við sig og konur hafa víða flykkst að baki henni, sérstaklega konur á miðjum aldri. Obama hefur að vísu tekist að fanga athygli þeldökkra kvenna að undanförnu, sem hefur gert það m.a. að verkum að vaxtarbroddur Clintons er úr sögunni. Hún getur í besta falli haldið í þann stuðning sem hún hefur fyrir.

Obama leiðir í Kaliforníu