Fyrstu viðbrögð Seðlabankans sjá dagsins ljós

Fjölmargir hafa bent á að á meðan Alríkisbankinn vestur í Ameríku hafi brugðist fljótt og með afgerandi hætti við erfiðleikum á fjármálamörkuðum hafi Seðlabanki Íslands setið á hliðarlínunni og horft aðgerðalausir á þróun efnahagsmála undanfarið. Á meðan íslenska krónan hefur verið í frjálsu falli undanfarið hafi bankinn ekki lyft litlafingri í átt að því að vernda krónuna. Reyndar hefur einnig verið bent á að hann sé ekki í stakk búinn til þess, hann sé allt of lítill og efnahagsstærðin Ísland sé allt of lítil til þess að takast á við umrót á alþjóðamörkuðum. Það er vissulega rétt. Að auki hefur verið bent á að íslensku bankarnir séu orðnir svo stórir að Seðlabankinn eigi erfitt með að fylgja þeim eftir.

Aðgerðir Seðlabankans munu væntanlega gefa sumum færi á að nálgast lausafé án þeirra gríðarlega vaxtaálaga sem eru nú einkennandi, sérstaklega fyrir íslenskar lánastofnanir. Hver áhrifin verða á gjaldeyrismarkaði mun fljótlega koma í ljós en margir bíða spenntir eftir að sjá þróunina á gjaldeyrismörkuðum í dag og næstu daga - en vaxtaákvörðun Seðlabankans mun hafa þar mikil áhrif. Nú er að sjá hver viðbrögðin verða á innlendum og erlendum mörkuðum, hvort Seðlabankinn hafi möguleika á að efla innviði hér heima og traust út á við. Alla vega munu þessar aðgerðir liðka eitthvað fyrir á innlendum lánamarkaði og smyrja fáein efnahagshjól.

Liðkað fyrir viðskiptum á fjármálamarkaði