Frú Clinton á góðri leið með að kljúfa Demókrataflokkinn

Forsetafrúin fyrrverandi virðist seilast æ lengra í viðleitni sinni til þess að sannfæra Demókrata um ágæti sitt. Sérlega neikvæðar auglýsingar um andstæðing sinn einkenna kosningaherferð hennar þessi dægrin. Fyrir ekki löngu síðan gerði hún það að sérstöku umtalsefni að gagnryna aðferðir Repúblikana, sem hún sagði vera neikvæðar og afar ógeðfelldar. Í þessu, sem svo mörgu öðru, hefur hún orðið uppvís að því að snúast í margar hringi og telur sér ekkert eftir að tileinka sér aðferðir sem hún í aðra röndina segist fyrirlíta.

Ef á móti blæs er ekki nema von að menn grípi til allt að því óvandaðra meðala. Frú Clinton veigrar sér ekki við að leita allra leiða og telur ekki eftir sér að kljúfa Demókrata í tvennt til þess að fóstra draum sinn um forsetaframboð og að lokum forsetatíð. Obama, sem alla jafna er vel liðinn, einnig á meðal Repúblikana, hefur fallið svo í áliti á meðal stuðningsmanna Clintons að yfir fjórðungur þeirra ætlar að styðja frambjóðanda Repúblikana, McCain, nái Obama tilnefningu Demókrataflokksins. Henni hefur því orðið svo ágengt í því að sverta andstæðing sinn að Demókratar munu mæta til forsetakosninga, allt að því klofnir.

Clintons baráttuaðferðir væru í sjálfu sér ekki eftirtektarverðar nema fyrir það að hún hefur iðulega skreytt sig með yfirlýsingum um að hún myndi ekki leggjast svo lágt að fara í drulluslag. Hún hefur ósjaldan sagst vera boðberi nýrra aðferða og bætts siðferðis en hefur æ oftar orðið uppvís að allt öðru. Ekki ósvipað og trúboðinn sem ítrekað er staðinn að verki með buxurnar niður á hælana. Reyndar þykir mér sem sjálfshól hennar minni um margt á sjálfbirgingshátt jafnaðarmanna heima á Íslandi en það er nú önnur saga.

Clinton mun sigra í dag en ekki með nægilegum mun til þess að snúa taflinu sér í hag. Hins vegar mun það ekki sannfæra hana til þess að draga sig í hlé - alla vega ekki strax. Sjálfbirgingsháttur frúarinnar mun væntanlega duga fram að næsta forvali í byrjun maí. Eftir það mun henni ekki verða stætt á að halda áfram. En hver veit, e.t.v. mún þrjóska og síngirni Clintons verða til þess að Demókratar klofna og McCain sigri í haust - ekki svo að skilja að hann eigi það ekki skilið karlinn - en undir öllum venjulegum kringumstæðum ættu Demókratar að sigra í haust.

Clinton hótar Írönum