Bill er ekki alveg sáttur

Ég hef lengi staðið í þeirri trú að frú Clinton væri sá aðili í hjónabandinu sem væri hvað metnaðarfyllst og tilbúin til að ganga langt í því að fá sínu fram (fyrir sig og manninn sinn). Nú bregður svo við að Bill Clinton getur ekki einu sinni fylgt fordæmi konu sinnar og óskað Obama alls hins besta. Á meðan frúin gerir heiðarlega tilraun til þess að fá stuðningsmenn sína yfir á band Obamas er Bill enn í nokkurri fýlu. Hann var sumpart þannig einnig í forkosningunum, sérhver tilraun hans til þess að vinna að framgangi frúarinnar leiddi til hins verra. Hann reyndist smámunasamur og neikvæður sem féll ekki í góðan farveg enda fór það svo að honum var vinsamlegast bent á að koma ekki nálægt framboði eiginkonunnar.

Hillary virðist hafa náð sér að mestu eftir vonbrigðin af því að tapa því sem virtist fyrirfram unnið kapphlaup um tilnefningu Demókrata. Hún þráaðist lengi við og nú er það að nokkru að koma í bakið á Demókrötum. All margir stuðningsmenn hennar geta ekki með nokkru móti stutt Obama og fjölmargir þeirra hugleiða stuðning við McCain. Reyndar er fylgið við Obama mun minna en margir gerðu ráð fyrir að afloknu forvalinu. Margir spáðu því að hann ætti sigurinn vísan og að McCain yrði honum auðveldur andstæðingur. Annað hefur komið á daginn. Á meðan Evrópubúar halda vart vatni af hrifningu hefur Obama átt í erfiðleikum heima fyrir að sannfæra kjósendur um ágæti sitt.

Það er nú einu sinni svo að bandarískir kjósendur vilja eflaust eitthvað meira en mann sem kemur vel fyrir og kann að koma fyrir sig orði. Fagurgali er ekki nægur - orðin verða að hafa innihald og trúverðugleika. Sannfæring orða hans verða að geta breitt að nokkru yfir reynsluleysi hans og ekki víst að varaforsetaefnið, Biden, nái að dekka það. En hvað um það, Clinton hjónin eru enn að kyngja ósigrinum frá því fyrr í sumar og Bill er sýnilega spældur - ekki bara yfir tapi konunnar, heldur einnig að á hann er ekki hlustað. Hann vill ólmur segja frá sinni glæstu forsetatíð, hvar og hvenær sem er og við alla. En það fær hann ekki að gera í Denver, skipuleggjendur óskuðu ekki eftir að ræða hans fjallaði um það.

Frambjóðandi X og frambjóðandi Y