Frakkar landa verðskulduðum sigri - erfitt verkefni framundan fyrir Íslendinga

Frakkar héldu áfram uppteknum hætti framan af síðari hálfleiks og komust í átta marka forystu. Er á seinni hálfleik leið gáfu Frakkar eftir og Svíar náðu að laga stöðuna. Greinilegt er að Frakkar sakna vinstri handar skyttu en allar aðrar stöður eru frábærlega mannaðar. Í andstreymi virtust Svíar aldrei gefast upp og dómgæslan var ef eitthvað er ekki þeim hagstæð. Rússnesku dómararnir leyfðu harðan varnarleik og var á köflum frábært að fylgjast með fóta- og handavinnu frönsku varnarmannanna. Keyrt á fullu í nær 60 mínútur en eins og áður sagði, gefið eftir í lokin og ef ég fer rétt með ekki skorað síðustu 9 eða 10 mínúturnar.

Sænsku þulirnir eru eilítið á nálum fyrir leikinn við Slóvaka en þykjast vissir um öruggan sigur Frakka á móti Íslendingum ef Frakkarnir spila á fullu. Ef Slóvakar tækju upp á að sigra Svía á morgun er staðan vænleg fyrir okkur en allt eins víst að Svíarnir nái að hamra stálið sitt fyrir átökin á morgun. Sóknin þeirra var alls ekki slæm, franska vörnin var bara betri og jafnan skrefi á undan sænsku sóknarmönnunum. Svensson sýndi gamla takta í seinni hálfleik og átti sinn þátt í að Svíar unnu hálfleikinn með einu marki. Nokkuð sá á sænsku leikmönnunum í átökum við andstæðingana og kann það að setja mark sitt á þá í leiknum á morgun.

Ef Íslendingar ætla sér sigur gegn Frökkum verður að spila af fullri hörku allan leikinn og aldrei gefast upp, sérstaklega ef illa gengur á kafla. Ef menn trúa ekki á eigin ágæti er leikurinn fyrirfram tapaður - nema Frakkar vanmeti okkur og telji leikinn formsatriði. Við skulum ekki treysta á slíkt glópalán.

Guðjón Valur: Batamerki á leik okkar

Athugasemdir

[Gunnar Th. Gunnarsson, 19.1.2008 kl. 22:06]

Góð umfjöllun hjá þér

[Ólafur Als, 19.1.2008 kl. 22:23]

Kærar þakkir, Gunnar. Ekki úr vegi að leyfa landanum að fylgjast með gangi leikja ...

[Bjarki (IP-tala skráð) 20.1.2008 kl. 01:43]

Já, Frakkar eru sterkir.  Líklegir em meistarar held ég.

En Svíar vinna Slóvaka hlýtur að vera.  Annað væri eitthvað skrítið.  Og Ísl. eiga ekki séns í Frakkana.  Ekki séns. Þó útkoman úr Slóvaka leiknum hafi óneitanlega verið ágæt (sérstaklega athyglisverður fyrri hálfleikur) þá var leikurinn liðsins ekkert til að hrópa húrra fyrir í sjálfu sér. Slóvakarnir klúðruðu svoleiðis málum að varla hefur annað eins sést í langann tíma.  Gáfu Ísl. hraðaupphlaup trekk í trekk.  Auk þess sem mér fannst dómararnir ekkert velviljaðir Slóvökum.

Þannig að þeir fara áfram með 0 stig sko.  Það bara er ekki nógu gott og má segja að þeir fari áfram til málamynda.  En auðvitað getur maður sagt sér sjálfur að ákaflega ólíklegt er að Ísl. vinni Svía eða Frakka á þessum áratugum á stórmótum.  Það er mjög ólíklegt en samt er alltaf möguleikinn til staðar.  En í þetta skipti (miðað við tvo undanfarna leiki) er nánast óhugsandi að Ísl. vinni Frakka. 

[Kristján (IP-tala skráð) 20.1.2008 kl. 11:39]

Var að hlusta á einhversskonar söngvakeppni í Sjónvarpinu. Hræðileg lög og skelfilega meðvirkir dómarar sem eru skoðanalausir og vinir vina sinna!