Umheiminn varðar lítið um örlög Tíbetbúa

Það má telja undrunarefni hve umheimurinn hefur látið sig málefni Tíbetbúa litlu varða. Sérstaklega er áberandi hve vinstri mönnum á Vesturlöndum hefur í raun staðið á sama um örlög þessa litla lands, og þess íbúa, sem Kína réðist inn í árið 1950 og lagði síðan undir sig á skömmum tíma. Þrátt fyrir afar óljósar fréttir af örlögum íbúa þessa hersetna lands er ljóst að Kínastjórn stóð fyrir hreinsunum á sjötta og sjöunda áratugnum, sem fólu í sér stórfelld manndráp og eyðingu aldagamalla menningarverðmæta (menningarbyltingunni 1966-69). Dalai-Lamann flúði land árið 1959 og útlagastjórn sett á laggirnar, sem árið 1962 setti saman lýðræðislega stjórnarskrá fyrir Tíbet.

Árið 1982 sagði Solzhenitsyn að leppstjórn Kínverja í Tíbet hefði staðið fyrir verstu voðaverkum nokkurrar stjórnar í sögu kommúnismans. Fyrir 20 árum hét öryggisfulltrúi Kínverja, Qiao Shi, að innleiða í Tíbet ógnarstjórn (merciless repression). Árinu eftir, 1989, fékk Dalai Lama friðarverðlaun Nóbels og Kínverjar komu á herlögum. Síðan þá hefur ástandið verið ótryggt en Peking stjórnin hefur hvergi látið eftir í ógnargreip sinni á Tíbet, enda hafa Kínverjar getað treyst á þögult samþykki umheimsins hingað til. Einhverra hluta vegna hafa hin sjálfskipuðu friðaröfl, undir forystu vinstri manna, ekki látið sig varða hlutskipti tíbesku þjóðarinnar. Við hin höfum og lokað að mestu augunum fyrir voðaverkunum í Tíbet og síðar á árinu munum við heiðra Kínverja með Ólympíuleikum. Minna má það ekki vera.

Búddamunkar mótmæla í Kína

Athugasemdir

[Birgitta Jónsdóttir, 15.3.2008 kl. 12:23]

Mikið er ég sammála þér... og mikið skammast ég mín fyrir að tilheyra heimi sem horfir framhjá slíkum voðaverkum. Ég er búin að skrifa þingmönnum, friðarsinnum og fleirum og beðið um tafarlausar aðgerðir út af ofbeldinu í Tíbet sem er í gangi á þessari stundu og ekki fengið nein svör.

[Ólafur Als, 15.3.2008 kl. 13:38]

Birgitta,

gangi þér vel í viðleitni þinni - mundu samt að ákalla alla, ekki einungis vinstri menn!

Hafa menn ekki safnað undirskriftum af minna tilefni en þessu?