Frakkar ganga óvissir til leiks

Framganga franskra handboltamanna síðari ár er um margt samofin Íslandi. Á Ólympíuleikunum í Barselóna árið 1992 sigruðu Frakkar Íslendinga í leik um bronsið og þremur árum síðar innbyrtu þeir sínum fyrsta heimsmeistaratitli í flokkaíþróttum (með bolta ...) á íslenskri grund. Núverandi þjálfari hefur stýrt þessu franska liði um árabil sem hefur nokkrum sinnum mætt því íslenska á undanförnum stórmótum. Þær viðureignir hafa gengið misvel, sigrar hafa unnist á ögurstundu en einnig töp.

Onesta er kurteis maður, þ.e. hann kann sig þegar hann fer í viðtöl. Eins og hann bendir réttilega á er mikill meðbyr með íslenska liðinu og árangur strákanna hefur fangað athygli margra enda ekki á hverjum degi sem smáþjóð kemur liði sínu í úrslit á Ólympíuleikum. Reyndar í fyrsta sinn. Hann veit sem er að hann verður að búa sína menn undir átök á morgun og vill eflaust minna sína menn á að íslenska liðið mun mæta sterkar til leiks en á dögunum þegar Frakkar höfðu sigur á heimavelli, sæmilega studdir af heimadómurum.

Íslenska liðið má vel við una að Fernandes er ekki lengur í leikmannahópi Frakka. Fyrir vikið er breiddin ekki jafn mikil hjá þeim. Okkar drengir eru sem fyrr vel stemmdir, bæði á líkama og sál og sérstaklega gaman til þess að vita að þeir ætla sér að gefa allt sitt í leikinn í fyrramálið. Þeir eru ekki saddir, segja þeir sjálfir. Hvernig sem fer mun drengjunum verða fagnað sem hetjum - minna eiga þeir, þjálfi þeirra og undirbúningshópur ekki skilið.

Íslendingar lýsa upp handboltann

Athugasemdir

[Sigurður Þórðarson, 24.8.2008 kl. 01:14]

Þetta kemur í ljós.